Սննդային կախվածություն

Սնունդը ոչ միան օրգանիզմի պահանջն է, այն մեզ հաճույք է պատճառում և, նույնիսկ, նպաստում շփմանը: Հատկապես, ճաշի սեղանի շուրջն են մարդիկ մտերմանում: Սակայն, որոշ մարդկանց համար սնունդը վտանգավոր սովորություն է դառնում:

Սննդային կախվածությունը շատ քիչ է տարբերվում ալկոհոլիզմից. այն նույն հոգեբանական արմատներն ունի: Ինչպես ալկոհոլիկը չի կարող հրաժարվել խմիչքից, այնպես էլ սննդից կախված մարդն ի վիճակի չէ դադարեցնել անընդհատ ուտելը, ամեն ինչ իրար խառնելով: Սննդային կախվածության դեպքում մարդն անընդհատ ուտում է, երբեմն չափից այնքան ավելի, քան օրգանիզմին է անհրաժեշտ: Անշուշտ, մշտապես շատ ուտելն առողջության համար տհաճ հետևանքների է հանգեցնում: Ավելորդ քաշ, հիպերտոնիա, շաքարային դիաբետ, այտուցներ, ստամոքս-աղիքային և սիրտ-անոթային համակարգերի խնդիրներ և սա սննդային կախվածության հնարավոր հետևանքների ոչ լրիվ ցուցակն է:

Որպես կանոն, սննդային կախվածությունը հրահրված է այն բանի հետ, որ մարդը չի կարողանում հաղթահարել սթրեսը: Արդյունքում նա պարզապես ՙուտում՚ է անգամ թեթև սթրեսը: Ամենից հաճախ դրանից տառապում են կանայք: Սակայն սննդային կախվածությունը կարելի է և պետք է հաղթահարել: Անհրաժեշտ է վերանայել սննդային սեփական վարքագիծը և սովորել սթրեսից ազատվել այլ միջոցներով: Ոչ-ոք չի կարող  համոզել կամ ստիպել որևէ մեկին վերանայել սնվելու  վարքագիծը: Ամեն ինչ բացառապես անհատով է պայմանավորված: Յուրաքանչյուրի առողջությունն իր ձեռքում է: Ի՞նչ է պետք անել:

Եթե մարդ սովորել է որևէ մթերքի և անընդհատ դա է ուտում, ապա այն սննդային կախվածություն չի համարվում: Դա պարզապես բուռն հակում է: Սննդային կախվածության մասին կարելի է խոսել, երբ մարդն անընդհատ ուտում է ոչ թե քաղցածությունից, այլ հուզական ցանկությունից ելնելով: Երբ մարդը տառապում է սթրեսից, նա վատ է զգում, տխուր է, մեղքի զգացողությունն է տանջում և նա փորձում է սննդի օգնությամբ ճնշել այդ զգացողություններն ու հույզերը, այդկերպ հանելով սթրեսը: Աստիճանաբար չափաբաժինն ավելացվում է ու մարդն սկսում է ավելի շատ ուտել: Փոքր չափաբաժիններն այլևս չեն բավարարում և չեն հանում սթրեսը, ընդ որում, մարդը ոչ թե սննդի համից է հաճույք ստանում, այլ հենց ուտելու գործընթացից և նրա համար միևնույնն է, թե ինչ է ուտում:

Որո՞նք են սննդային կախվածության դրսևորումները

Հնարավոր է ձեզ մոտ սննդային կախվածություն է, եթե  մարդը`

• ուտելու ժամանակ մտածում է, թե հաջորդ անգամ ինչ է ուտելու,
• չի կարողանում անտարբեր անցնել մթերային խանութների կողքից ոչինչ չառնելով,
• խանութից դեռ դուրս չեկած, սկսում է գնումները բացել և անմիջապես ինչ-որ բան ուտել, եթե, նույնիսկ, սոված էլ չէ,
• լիքը ստամոքսով էլ շարունակում է ուտել մինչև սննդի մնացորդները չվերջանան:
• միաժամանակ, գիտակցաբար հասկանում է, որ չարժե այդքան շատ ուտել, սակայն անկարող է դիմադրել ուտելու ցանկությանը:

Արդյունքում բարձրանում է ճնշումը, արյան մեջ խոլեստերինի մակարդակը, շնչահեղձություն է դրսևորվում, շաքարային դիաբետի  և սիրտ-անոթային հիվանդությունների ռիսկն է մեծանում: Սննդային կախվածությունը վտանգում է մարդուն ոչ միայն ֆիզիկապես, այլև նյութապես, հոգեբանորեն և հուզականորեն: Ի լրումն ավելորդ քաշի, կորցնում է նաև ինքնահարգանքը:

Ինչպես ազատվել սննդային կախվածությունից

Պահել սնունդ ընդունելու օրագիր և այնտեղ գրանցել օրվա ընթացքում ընդունած սնունդը: Առավոտյան անոթի և գիշերը քնելուց առաջ կշռվել և արդյունքները գրանցել օրագրում, ապա դրանք համեմատել: Դա թույլ կտա ինքնաքննադաբար մոտենալ սննդի ընդունման սեփական չափաբաժնին: Ի դեպ, վերջերս անկացրած հետազոտությունները ցույց են տվել, որ նման գրանցումները մարդուն թույլ են տալիս ավելի արագ հարմարվել և սննդի ընդունումը կրճատել 10%-ով և, նույնիսկ ավելի: Հարկ է գիտակցել, որ ուտել պետք է քաղցած ժամանակ, Սննդային կախվածությունից ազատվելն այնքան էլ դյուրին գործ չէ, այն մեծ ջանքեր է պահանջում: Հարկ է դուրս գալ այդ կախարդական շրջանից, փոխել վերաբերմունքը սննդի նկատմամբ և ձեռք կբերել առողջություն ու գերազանց ինքնազգացողություն:

Հարցեր, պատասխաններ, մեկնաբանություններ